Meta tkellmet fil-ftuħ tas-Sessjoni Plenarja tal-Parlament Ewropew fi Strasburgu, il-President tal-Parlament Ewropew ħeġġeġ biex tinstab soluzzjoni għall-immigrazzjoni, fl-istess linja tal-ambizzjoni tal-Parlament Ewropew.
F'dawn l-aħħar ġimgħat, tilfu ħajjithom fil-baħar aktar nies. Aktar ħolm li tfarrak għal dejjem. Aktar ommijiet u missirijiet li qatt mhuma se jisimgħu minn uliedhom. Aktar tfal, nisa u rġiel li mietu f'ċirkostanzi ta' disprament, għal darb'oħra.
Din il-problema hemm bżonn li nindirizzawha. Huwa dmir tagħna, hija r-responsabbiltà tagħna. Aħna parti mill-ġenerazzjoni ta' politiċi li ma tistax tinjora din ir-realtà. Il-Parlament tagħna rnexxielu jsib il-mod kif jimxi 'l quddiem fir-rigward tal-migrazzjoni, mod li huwa ġust u uman ma' dawk li għandhom bżonn protezzjoni, li huwa ekwu u sod ma' dawk li mhumiex eleġibbli u li huwa iebes ma' dawk it-traffikanti li jisfruttaw lil dawk l-iktar vulnerabbli u japprofittaw mid-disprament tal-bniedem. L-atturi kollha kkonċernati issa għandhom ikunu denji tal-ambizzjoni, biex l-Unjoni tagħna żżomm kelmtha.
Nagħmel appell tal-aħħar: ma rridux inkunu jew insiru indifferenti għat-traġedja li tiġri quddiem għajnejna. Ma nistgħux nibqgħu nittolleraw li aktar nies isiru biss ċifri anonimi għal skopijiet statistiċi. Barra minn hekk, ma rridux naċċettaw aktar li l-Mediterran jibqa' ċimiterju ta' ħajjiet imkissra u ta' tama mfarrka.