Hi u tindirizza l-Laqgħa ta’ Rimini, il-President tal-Parlament Ewropew Roberta Metsola qalet li l-Ewropa mhijiex kompluta u tiddependi fuq kull wieħed u waħda minna. Fid-diskors tagħha, hija tkellmet dwar il-paċi, dwar is-sigurtà, dwar il-kompetittività u dwar is-solidarjetà.
Bonġu lil kulħadd. Grazzi talli lqajtuni fostkom. Huwa unur, iżda hija wkoll responsabbiltà, li d-diskussjonijiet tagħna noħduhom lura fl-Ewropa. Grazzi President Scholz – grazzi, għażiż Bernhard – tal-istedina tiegħek u talli lqajtni b’tant entużjażmu. U grazzi wkoll lill-voluntiera kollha li ltqajt magħhom dalgħodu u lis-soċjetà ċivili, li għamlu dan kollu possibbli. Xtaqt nibda billi ngħid li l-Ewropa hija dak li aħna, ilkoll kemm aħna, għandna l-kuraġġ li nagħmlu possibbli. L-Ewropa mhijiex definita. Mhijiex kompleta. Iżda l-futur ta’ dan il-proġett uniku fid-dinja jiddependi minn kull wieħed u waħda minna. U l-appell tiegħi huwa dan: ejjew niġġieldu għall-Ewropa. Ma nistgħux inċedu. Ejjew ma nissottovalutaw qatt dak li nistgħu nsiru. Għadna fil-bidu tal-proġett tagħna. Iva, id-dinja nbidlet, iva, l-Istati Uniti huma aktar ikkumplikati minn kif kienu, iva, il-gwerra fl-Ukrajna esponiet id-dipendenza tagħna mir-Russja, iva, is-sitwazzjoni terribbli f’Gaża wriet lill-ġenerazzjoni l-ġdida kemm għandna bżonn Ewropa aktar b’saħħitha li tirsisti għall-paċi u, iva, kif qal Mario Draghi, il-forza ekonomika u s-setgħa ta’ persważjoni tal-Ewropa sempliċement m’għadhomx biżżejjed biex jiżguraw li l-Ewropa tibqa’ mexxejja globali. L-istatus quo jfisser li ċedejna. Ifisser li qed nippermettu li l-Ewropa titwarrab. L-Ewropa qatt ma kienet spettatriċi fid-dinja u qatt m’għandna nidraw li nsiru hekk. Aħna mexxejja. Għandna bżonn biss il-kuraġġ biex nieħdu d-deċiżjonijiet li jeħtiġilna nieħdu. Hemm bżonn li nieqfu naħsbu dwar l-Ewropa kif inhi llum u nibdew nibnu l-Ewropa li tista’ tkun fil-futur. L-Ewropa fadlilha biss żewġ għażliet: li tinbidel b’mod kuraġġuż jew li bil-mod il-mod taqbad it-triq agonizzanti għan-niżla u ssir irrilevanti. Jien favur il-bidla. Il-Parlament Ewropew favur il-bidla. Ilkoll nafu li l-bidla mhijiex faċli. Il-bidla tirrikjedi sagrifiċċju. Hemm bżonn li nistaqsu lilna nfusna l-mistoqsijiet diffiċli: irridu li nkunu nistgħu niddefendu lilna nfusna? Irridu nintegraw tassew is-swieq tagħna u nisfruttaw il-potenzjal enormi li nafu? Irridu nappoġġjaw in-negozji u l-imprendituri tagħna? Irridu niżguraw l-mudell ta’ impriża libera tagħna u x-xbieki ta’ sikurezza soċjali tagħna? Mela t-tweġiba, ħbieb tiegħi, hija waħda: l-Ewropa. L-Ewropa u dak kollu li tista’ ssir. Wasal iż-żmien li nibnuha. Dak li għedt inti, Bernhard, huwa minnu: l-Unjoni Ewropea ffaċċjat sfidi li, sa ftit snin ilu, kienu jkunu inimmaġinabbli. Huwa minnu li dawn huma reali u huwa minnu wkoll li dawn l-aħħar snin fissru li, sabiex nirreaġixxu għad-dinja l-ġdida li ngħixu fiha issa, l-Ewropa jeħtiġilha tinbidel. Jeħtiġilha ssir aktar aġli, aktar rapida, aktar ġusta, jeħtiġilha tkun aktar kapaċi tikseb ir-riżultati għan-nies, tkun aktar kapaċi tuża l-għodod li għandna, u tkun kuraġġuża biżżejjed biex toħloq dawk l-għodod li jkun għad m’għandhiex. Dan ifisser li tammetti li l-istatus quo, li lkoll kemm aħna konna komdi ħafna bih, u li ggarantixxa bidla għal ġenerazzjoni sħiħa, m’għadux adegwat għall-iskop tiegħu. Il-kelma “kuraġġ” hija waħda diffiċli biex tintuża fil-politika. Kultant jinħass li kulħadd iridha l-bidla, iżda ftit biss fil-verità huma lesti jinbidlu. F’dawn l-aħħar snin, il-Parlament Ewropew ġie riformat radikalment għax indunajna li jekk l-istituzzjonijiet tagħna ma jħarsux fil-bogħod biżżejjed, isiru kompjaċenti wisq, jew jittaqqlu wisq bil-burokrazija biex jadattaw, iċ-ċittadini se jitilfu l-fiduċja fil-kapaċità tal-Ewropa li żżomm il-wegħdiet tagħha. L-għażiż ħabib tiegħi David Sassoli kien wissiena wkoll dwar dan proprju hawnhekk, f’Rimini. L-Ewropej min-natura tagħhom huma kostrutturi, innovaturi, inventuri, imprendituri – nikkreaw u nistinkaw biex niksbu l-eċċellenza. Huwa dan li wassal biex din il-parti tad-dinja tkun il-protagonista tal-bidla globali u tar-rivoluzzjonijiet industrijali. Huwa b’dan il-mod li ħloqna l-arti, rawwimna l-kultura, bnejna n-negozji u għenna lil ġenerazzjonijiet sħaħ joħorġu mill-faqar u mill-gwerer u jsibu l-prosperità. Ftit huma dawk li dan jafuh aktar mill-Italja. Ilbieraħ filgħodu kont f’villaġġ żgħir fil-Calabria u ltqajt ma’ Nicola, imprenditur żagħżugħ. Dak li jixtieq Nicola mill-Ewropa huwa li tagħmillu ħajtu ftit anqas ikkumplikata sabiex in-negozju żgħir tiegħu jkun jista’ jikber fil-post tant sabiħ fejn jgħix. Nicola mhux qed jitlobna wisq. Huwa għalhekk li l-messaġġ tiegħi llum huwa wieħed ta’ ottimiżmu u tama. Ta’ fiduċja fil-kapaċità tagħna li naffrontaw dan il-mument. L-Ewropa ma nħolqitx biex tkun spettatriċi, u mhijiex fin-natura tagħha li ssir hekk. L-ewwel pass huwa li noħolqu l-kundizzjonijiet it-tajba għal tkabbir stabbli u sostenibbli: billi nissimplifikaw ir-regoli, napprofondixxu s-suq uniku tagħna u nespandu l-kummerċ. U rrid nassigurakom li l-Parlament Ewropew mhux qed jibża’ jieħu d-deċiżjonijiet meħtieġa biex l-Ewropa timxi ’l quddiem. Ftit tax-xhur ilu, il-President Mattarella, matul iż-żjara tiegħu fil-Parlament Ewropew, iddeskriva l-Parlament tagħna bħala “ċ-ċentru ta’ gravità li jgħaqqad l-istituzzjonijiet u ċ-ċittadini”: din hija responsabbiltà li nieħdu bis-serjetà. Fir-rigward tal-aġenda ta’ simplifikazzjoni tagħna – il-qalba tal-impenn tagħna li nibnu Ewropa li taħdem aħjar għaċ-ċittadini tagħha – qed nagħmlu progress ukoll. Fl-Italja u fl-Ewropa l-innovaturi, it-talent u l-kreattività ma jonqsux. Żort ħafna ċentri ta’ eċċellenza teknoloġika, inkluż is-superkompjuter Leonardo, wieħed mill-aktar kompjuters b’saħħithom fl-Ewropa, li jinsab f’Bologna, u li kapaċi jipproċessa kwantitajiet enormi ta’ data u jappoġġja r-riċerka u l-innovazzjoni. Iżda nafu wkoll li l-adozzjoni ta’ 13,000 att leġiżlattiv fil-leġiżlatura preċedenti – meta mqabbla ma’ 3,000 att biss fl-Istati Uniti – tkun ixxekkel il-possibbiltà ta’ kull min irid imexxi t-triq lejn il-futur. U għalhekk jeħtieġ li nkunu onesti magħna nfusna. Dwar f’liema ambiti mxejna wisq u f’liema mxejna malajr wisq. F’liema ambiti, forsi, ma mxejniex biżżejjed. Hija din ir-riflessjoni, din il-konsapevolezza, li llum trid tiggwida l-mod kif niggvernaw u nilleġiżlaw, kif ukoll il-ħidma ta’ kuljum li jien u l-kollegi tiegħi nwettqu fid-Dar tagħkom fl-Ewropa. Huwa dan li wassal għall-kompromess rigward id-dossier dwar l-imballaġġi – speċjalment bis-saħħa tal-kontribut tal-industrija Taljana u tal-isforzi tal-Membri tal-PE Taljani, fosthom xi kollegi preżenti fis-sala, li nieħu l-okkażjoni biex insellmilhom: l-Onorevoli Picierno, Sberna, Fidanza, Salini, Gori. Grazzi tal-preżenza tagħkom hawn. Huwa dak li ppermettielna nipposponu l-applikazzjoni tar-rekwiżiti tar-rapportar u tad-diliġenza dovuta għall-kumpaniji, u l-aġġustament mill-ġdid tal-limiti minimi tariffarji tal-importazzjoni u b’hekk ipproteġejna lill-kumpaniji Ewropej li għadhom fil-każi ta’ konsolidament. Jeħtieġ li nibqgħu allinjati maċ-ċittadini tagħna. Fl-Ewropa, l-industriji tagħna jsostnu miljuni ta’ impjiegi. L-Ewropa għandha tagħti anqas lezzjonijiet ta’ moraliżmu u taġixxi aktar. Jien kburija bl-industriji tagħna u nixtieq ngħinhom, mhux infixkilhom. Għalhekk, fl-aħħar mill-aħħar, il-prinċipju tagħna huwa sempliċi: fejn hemm lok li nagħmlu l-affarijiet aktar faċli, aktar sempliċi u anqas ikkumplikati, jeħtiġilna nagħmlu hekk. Fejn hemm bżonn nirranġaw l-affarijiet u nadattaw ruħna għar-realtajiet il-ġodda, għandna nagħmlu hekk. Din hija d-direzzjoni li qed nagħtu lill-ħidma tagħna. L-istess jgħodd għat-tisħiħ tas-swieq uniċi tal-enerġija, tas-servizzi bankarji, tas-swieq kapitali, tat-telekomunikazzjonijiet u tad-difiża tagħna. Dan huwa l-mod kif nistgħu nnaqqsu d-distakk teknoloġiku fil-konfront tal-Istati Uniti u ċ-Ċina. Integrazzjoni aktar profonda dan tista’ tappoġġjah. Tkun tnaqqas il-prezzijiet, iżżid l-investimenti u tagħmilha aktar faċli għall-kumpaniji biex joperaw fl-Ewropa kollha. Waħda mill-aħbarijiet l-aktar rilevanti f’dawn l-aħħar xhur tirrigwarda t-taħditiet kummerċjali bejn l-Unjoni Ewropea u l-Istati Uniti. Ejjew inkunu ċari: m’hemm l-ebda alleanza aktar b’saħħitha, u lanqas m’hemm sintonija demokratika aktar profonda fl-istorja tad-dinja moderna, minn dik bejn l-Ewropa u l-Istati Uniti tal-Amerka. Il-kumpaniji tagħna u l-istil ta’ ħajja tagħna huma integrati. Il-ftehim kummerċjali proviżorju huwa pass ’il quddiem għar-relazzjonijiet trans-Atlantiċi tagħna u għall-fiduċja bejn iż-żewġ kontinenti tagħna. Il-Parlament se jagħmel xogħlu: se jeżaminah mill-qrib biex jiżgura li jkun tajjeb għan-negozji u għall-konsumaturi tal-Ewropa. Iżda ejjew nieħdu din l-esperjenza bħala tagħlima. Jeħtiġilna nħarsu lil hinn, lejn sħubijiet mal-Afrika u mal-Amerka Latina, ibbażati fuq investimenti u sħubijiet kummerċjali b’saħħithom. Dan huwa l-messaġġ li nwassal f’kull pajjiż li nżur, u se nwasslu wkoll il-ġimgħa d-dieħla fis-Summit tal-Presidenti tal-Parlamenti tal-G7 fil-Kanada. L-Ewropa qatt ma beżgħet taħdem qatigħ biex tibni kooperazzjoni globali u ssostni l-ordni dinji. Fl-ebda post dan ma jidher aħjar milli fl-Ukrajna. Kiev ma kinitx tkun ħielsa llum mingħajr l-appoġġ tal-Ewropa. In-negozjati għall-paċi ma jkunux possibbli mingħajr l-isforzi kostanti tal-Ewropa. F’dan l-impenn, nixtieq nirringrazzja lill-President Meloni u lill-Ministru għall-Affarijiet Barranin Tajani tal-kontribut deċiżiv tal-Italja fid-difiża tal-valuri Ewropej. Dejjem irsistejna għall-paċi – paċi reali – li tinbet mill-kapaċità tal-Ukrajna li tibqa’ b’saħħitha. U jeħtieġ li nkomplu nispjegaw għaliex l-appoġġ tagħna għall-Ukrajna jingħata b’tant determinazzjoni. Mhuwiex biss kwistjoni ta’ altruwiżmu iżda huwa wkoll kwistjoni tal-kapaċità tagħna – tal-Ewropa – li niddefendu lilna nfusna u tal-aspirazzjoni tagħna li ngħixu ħielsa. Prinċipju li ma ninsewh qatt. Dan huwa minn fejn hi ġejja l-insistenza tagħna fuq garanziji reali ta’ sigurtà – għaliex l-istorja tgħallimna li mingħajrhom, kulma niksbu jkun il-posponiment ta’ kunflitt akbar u aktar imdemmi fil-futur, b’konsegwenzi ferm agħar. Għaldaqstant, dażgur li rriduha l-paċi. Dejjem ridnieha. Iżda paċi dejjiema. Li żżommna lkoll sikuri. Li tkun ibbażata fuq il-prinċipju ta’ “xejn dwar l-Ukrajna mingħajr l-Ukrajna” – u biex dan iseħħ irid ifisser li xejn dwar l-Ewropa ma jista’ jiġi deċiż mingħajr l-Ewropa. Mhux għax irridu l-gwerra iżda għax irridu l-paċi. U nifhmu li rridu nżommu l-kunsens tan-nies u li dan qed isir aktar diffiċli b’ġenerazzjonijiet ta’ żgħażagħ aktar xettiċi. Huwa għalhekk li għandna bżonn il-Parlament Ewropew – il-vuċi eletta taċ-ċittadini. Jeħtieġ ukoll li nindirizzaw pubbliku aktar żagħżugħ u aktar xettiku dwar ir-rwol tal-Ewropa biex tinstab triq ’il quddiem fil-Lvant Nofsani u f’Gaża, fejn is-sitwazzjoni għadha orribbli. Wisq vittmi innoċenti. L-ostaġġi għadhom ma nħelsux. U wisq tfal qed iġarrbu l-konsegwenzi; ilbieraħ inqatlu aktar ġurnalisti: din is-sitwazzjoni hija intollerabbli. Irridu li l-qtil jieqaf. Irridu li t-tbatija tintemm, u li l-ostaġġi jinħelsu. Ma nistgħux nibqgħu indifferenti. Għandna d-dmir fil-konfront tal-ġenerazzjonijiet futuri kollha li ngħinu biex jintemm dan iċ-ċiklu ta’ gwerra perpetwa. U dan huwa possibbli. Għeżież ħbieb tiegħi, Is-sigurtà, il-kompetittività, is-sussidjarjetà, is-simplifikazzjoni, il-paċi – dawn mhumiex biss kliem fieragħ. Huma l-pedamenti tal-kapitlu li jmiss tal-Ewropa. Jekk irridu l-paċi, jeħtiġilna nħarsuha. Jekk irridu t-tkabbir, jeħtiġilna niffaċilitawh. Jekk irridu l-fiduċja, jeħtiġilna naħdmu għaliha. U jekk irridu mmexxu, jeħtiġilna ninbidlu – b’liġijiet aktar intelliġenti, b’politiki koerenti u bil-kuraġġ li naġixxu. Grazzi. Viva l’Italia e Viva l’Europa.