Il-futur tal-Ewropa jinsab f'idejn l-Ewropej - Metsola f'Parma  

Grazzi u l-lejla t-tajba,
Għeżież studenti, għażiża Francesca, ħassejtni vera kburija nisimgħek, b’nisa b’saħħithom bħalek, il-futur tal-Italja u tal-Ewropa jidher sabiħ ħafna. Grazzi Francesca.
President Azzali,
Sindku Guerra,
Rettur Martelli,
President De Pascale, Ewroparlamentari,
Għeżież mistednin,
Għeżież ħbieb,
 
B’emozzjoni kbira qiegħda nitkellem hawn, f’dan l-ambjent meraviljuż tal-Fwajè tat-Teatro Regio ta’ Parma, post li jirrefletti l-vivaċità kulturali kollha ta’ waħda mill-istituzzjonijiet teatrali l-aktar prestiġġużi tal-Italja.
 
Nixtieq ukoll nagħti ġieħ lill-predeċessur tiegħi, il-mibki David Sassoli u nittama li jkun kburi bil-Parlament tagħna u bix-xogħol li qegħdin nagħmlu.
 
Għeżież studenti tal-Kulleġġ Ewropew ta’ Parma, jien attendejt il-Kulleġġ tal-Ewropa ta’ Bruges. Ma rridx niftaħ dibattitu dwar liema università hija l-aqwa, iżda nikkonċedilkom ħaġa waħda: żgur li hawn l-Italja u f’Parma tiekol aħjar.
 
Qabel ma nibda l-Lectio tiegħi rrid ngħidilkom ħaġa: kull darba li nkellem lill-istudenti, ma nistax ma naħsibx fis-snin universitarji tiegħi. Ħriġt għall-ewwel elezzjonijiet Ewropej tiegħi meta kont għadni qed nistudja u l-ġenituri tiegħi kienu inkwetati ħafna b’dan. Għalija riedu xi ħaġa stabbli. Imma jien ħassejt vokazzjoni. Dmir. Kelli ħafna ideat. Ħafna tama. Xtaqt nagħti sehmi. U kont immotivata biex inbiddel l-affarijiet.
 
Wieħed u għoxrin sena wara, dik il-vokazzjoni għadni nħossha. Kuljum. U dak is-sens ta’ responsabbiltà ssaħħaħ saħansitra aktar wara dak li talbuna l-eletturi fl-elezzjonijiet Ewropej ta’ Ġunju li għadda, kważi sena ilu.
 
Il-messaġġ ma setax ikun aktar ċar: ħafna ħassew li tlabna wisq mingħandhom u tlabnieh malajr wisq. Li ma ġewx ikkunsidrati iżjed. Li l-vuċijiet tagħhom ma nstemgħux u li ma kinux apprezzati.
 
Huwa minnu li l-Ewropa li kienu jemmnu fiha – dik li ispirat lill-istudji tagħkom u lil tiegħi – kienet mibnija biex tissemplifika l-ħajja tan-nies. Iżda f’din it-triq, l-Ewropa spiċċat tagħti l-impressjoni li qiegħda tivvalorizza aktar il-proċess milli l-iskop. Hemm wisq nies iħossuhom li tħallew lura u qed jitħabtu biex jaslu sal-aħħar tax-xahar bir-riżorsi li għandhom għad-dispożizzjoni tagħhom. Hemm wisq impriżi fgati bil-burokrazija u bil-prezzijiet li qed jogħlew. Hemm wisq żgħażagħ li ma jistgħux isibu xogħol u jistaqsu bejnhom u bejn ruħhom jekk qatt hux se jirnexxilhom jixtru dar – naf li hemm ħafna fostkom li għandhom dan l-istess inkwiet iberren f’moħħhom.
 
Spiss għamilna enfasi fuq il-viżjoni morali tagħna, iżda mingħajr ma rnexxielna nuru b’mod biżżejjed ċar kif din tista’ tissarraf f’soluzzjonijiet konkreti biex ħajjet in-nies tkun aħjar u aktar ġusta.
 
Minkejja dan, is-sinjali hemm kienu. Il-Konferenza dwar il-Futur tal-Ewropa, sentejn ilu, kienet diġà indikat il-bżonn ta’ riformi u tibdil qawwi. Iżda dawk l-indikazzjonijiet twarrbu, kważi ntesew. Sadattant, il-forzi fl-estremitajiet tal-ispettru politiku rnexxielhom jaħfnu l-iskuntentizza u jdawruha f’kunsens. Minflok ma affrontajniehom b’ideat u bi tweġibiet, spiss wisq ma tajniex kashom u ssottovalutajniehom.
 
Issa, tifhmunix ħażin: jien nemmen ħafna f’dan il-proġett. Nemmen f’dak li bnejna u f’dak li għad nistgħu nwettqu flimkien. U nassigurakom li diffiċli ssibu persuna aktar Ewropeista mill-President tal-Parlament Ewropew.
 
Iżda li tkun Ewropeista ma jfissirx li ma tiddubitax. Bil-maqlub: ifisser li nkunu biżżejjed onesti biex nirriflettu, nisimgħu aktar u ndawru r-rotta meta jkun meħtieġ. Għalhekk nirrifjuta noqgħod hawn biex ngħidilkom li jekk nibqgħu ma nagħmlu xejn se noħorġu minn din is-sitwazzjoni. Mhuwiex il-każ.
 
Mario Draghi semma “l-agonija bil-mod tad-deklin”. U hemm raġuni għala ġejt hawn l-Italja biex inkellem lilkom ukoll. Pajjiżkom minn dejjem fehem il-bżonn li jadatta ruħu għat-tibdil. Mhijiex kumbinazzjoni li d-dokument li wassal għall-proġett komuni tagħna jġib isem il-belt kapitali tagħkom: it-Trattati ta’ Ruma, iffirmati fil-25 ta’ Marzu 1957. Dak il-mument ikkaratterizza l-viżjoni fil-bogħod ta’ ġganti bħal Alcide De Gasperi u Altiero Spinelli.
 
U aktar tard, ta’ pijunieri Ewropej bħal Sofia Corradi – magħrufa b’ċerta mħabba bħala “mamma Erasmus”. Nisa u rġiel li kellhom il-kuraġġ jisfidaw l-istatus quo. Immaġinaw xi ħaġa li kienet għadha ma teżistix – u mbagħad bnewha.
 
Xejn minn dak li għamlu kien inevitabbli. Kienet il-politika. Kien il-kuraġġ.
 
U dik il-ħaġa ħadmet. L-Ewropa bniet perkors straordinarju: mis-suq uniku għall-munita unika, mill-elezzjoni diretta tal-Parlament Ewropew għat-tkabbir progressiv li bis-saħħa tiegħu ngħaqdu l-popli u l-pajjiżi li qabel kienu mifrudin minn ħitan u purtieri.
 
L-adeżjonijiet sussegwenti ma kinux biss espansjoni ġeografika, iżda riaffermazzjoni tal-valuri komuni: paċi, demokrazija, drittijiet, kooperazzjoni. Għal għexieren ta’ snin imxejna bis-saħħa ta’ dik il-viżjoni oriġinarja, kapaċi nittrasformaw il-wegħdiet f’realtà.
 
Imma l-Ewropa ma tistax tgħix bin-nostalġija. Mhux biżżejjed li ngħożżu l-passat: jeħtiġilna nġeddu l-impenn tagħna, norjentawh lejn il-futur u nrabbu l-kuraġġ meħtieġ biex nilqgħu għall-isfidi li qed jistennewna.
 
Issa huwa l-mument li nagħtu dik l-ispinta li hemm bżonn għall-bidla – il-bidla urġenti li ċ-ċittadini qed jitolbu minna. Nerġgħu nibnu l-fiduċja, inġeddu dak il-patt sagru bejn l-istituzzjonijiet u ċ-ċittadini, nerġgħu nqiegħdu l-Ewropa f’idejn l-Ewropej. Hekk narah ir-rwol tiegħi bħala President tal-Parlament Ewropew. U naf li ħafna mill-kollegi Taljani tiegħi preżenti hawn jaħsbuha bħali.
 
Iċ-ċittadini mhumiex qed jitolbu wisq mill-Ewropa.
 
Qed jitolbu Ewropa li taħdem, li tissemplifika konkretament il-ħajja ta’ kuljum. Ewropa li tieħu rwol ta’ tmexxja, li tkun taf tiggwida l-bidla u tiftaħ it-toroq, billi toffri impjiegi ta’ kwalità, opportunitajiet usa’ u l-possibbiltà reali li dak li jkun jibni futur. Ewropa li tipproteġi – il-konfini tagħna, il-valuri tagħna, in-nies tagħna.
Fuq kollox, qed jitolbu serħan il-moħħ. Iċ-ċertezza li, f’dinja instabbli, mil-lat ġeopolitiku u ekonomiku, l-Ewropa tkun tista’ tqum fuq saqajha u tibqa’ soda.
 
It-tweġiba tagħna trid tkun dik li nibnu Ewropa aktar konxja, aktar b’saħħitha, aktar sigura.
 
Ewropa aktar konxja hija dik li tirrikonoxxi kif il-libertà individwali u s-sistemi ta’ protezzjoni soċjali jissejsu fuq il-kapaċità tagħna li nibqgħu kompetittivi.
 
Ma jistax ikollna waħda mingħajr l-oħra. Hemm bżonn Ewropa li fiha l-burokrazija tonqos b’mod radikali, fejn l-impriżi jkunu jistgħu jikbru, joħolqu l-impjiegi, fejn l-innovazzjoni tkun valorizzata u l-istart-ups ikollhom l-ispinta biex jaffermaw ruħhom u jistagħnew.
 
Huwa dan is-sens tal-aġenda tas-semplifikazzjoni tal-Unjoni Ewropea. Mhuwiex dak li, konxjament jew le, jippenalizza lill-bdiewa tagħna, lill-azjendi tagħna, liċ-ċittadini tagħna, għall-benefiċċju ta’ dawk li jinsabu barra mill-kontinent tagħna. Il-prijoritajiet tagħna mhumiex inkompatibbli ma’ xulxin. Bis-saħħa tal-bilanċ it-tajjeb, jistgħu jsaħħu lil xulxin.
 
U permezz ta’ din il-loġika nistgħu nibnu Ewropa aktar b’saħħitha. Ewropa li taf tirrikonoxxi kif, minkejja li individwalment aħna żgħar, flimkien aħna forza reali. Dan ifisser li nlestu s-swieq uniċi tal-enerġija, tat-telekomunikazzjonijiet u tad-difiża – u speċjalment nwettqu l-Unjoni tat-tfaddil u tal-investimenti. Jeħtieġ li jkun possibbli li idea tinbidel f’impriża, li jinstab il-kapital, li nitgħallmu mill-fallimenti u nerġgħu nibdew, għal darba tnejn. Ma nistgħux nibqgħu nistennew.
 
Ewropa li tirrikonoxxi li waħedna, għandna ftit setgħa iżda flimkien, aħna forza li dak li jkun irid jagħti kasha.
 
It-trasformazzjoni diġitali u l-intelliġenza artifiċjali diġà huma r-rivoluzzjoni industrijali li jmiss. Dalgħodu attendejt l-Assemblea Nazzjonali tal-Confindustria u ftit sigħat ilu kont it-Tecnopolo ta’ Bologna.
 
Li kieku xi ħadd ikollu xi dubji mit-talent, mill-ħiliet, mill-potenzjal tal-Ewropa, kont ngħidlu jiġi hawn, fl-Italja.
 
Imma jekk tassew irridu li l-Ewropa tkun fuq quddiem nett – fl-intelliġenza artifiċjali, fis-settur farmaċewtiku, fl-ispazju, fl-innovazzjoni klimatika – jeħtiġilna nagħtu lill-inġiniera, lir-riċerkaturi u lill-imprendituri l-għodda biex jagħmlu dan.
 
Huwa fundamentali li nsaħħu lill-Ewropa minn ġewwa, iżda dan għandu jissarraf f’sigurtà barra mill-Ewropa. Bl-Istati Uniti li qed jerġgħu jaffermaw l-influwenza tagħhom, biċ-Ċina li qed tikkonsolida l-pożizzjoni tagħha u bil-pajjiżi emerġenti bħall-Indja li qed iwessgħu l-firxa tal-azzjoni tagħhom, l-Ewropa ma tistax tispiċċa titgħattan bejniethom.
 
L-approċċ ekonomiku globali tagħna minn dejjem kien: ftuħ, ekwità, regoli. Aħjar jiggwadanja kulħadd milli jitlef kulħadd – anki jekk xi ħadd jitlef naqra anqas.
U fir-relazzjoni mal-Istati Uniti, ma jagħmlilniex tajjeb inbiddlu alleanza f’kompetizzjoni. L-azjendi tagħna huma integrati, l-istess bħal ħajjitna. Dażgur li se jkollna xi ngħidu bejnietna u m’aħniex se naqblu, imma jeħtiġilna nkomplu nibnu, nilħqu qbil u nibqgħu alleati u ħbieb.
 
M’għandniex inkunu inġenwi. Tgħallimna aspejjeż tagħna li alleanza waħda – b’saħħitha kemm tkun b’saħħitha – mhix biżżejjed biex inħossuna siguri. Ir-reżiljenza tiddependi minn bosta alleanzi, u minn alleanzi sodi.
 
Għalhekk, jeħtiġilna nsaħħu r-rabtiet ma’ sħab bħar-Renju Unit, il-Kanada u l-pajjiżi Afrikani, li magħhom niżviluppaw investimenti u relazzjonijiet kummerċjali sodi. L-istess jgħodd għall-Amerka Latina. It-tema tal-migrazzjoni hija importanti, imma ma tistax tirrappreżenta l-uniku ambitu tal-kollaborazzjoni tagħna.
 
Dan jiggarantixxi Ewropa aktar sigura. Għax mingħajr is-sigurtà, ma jista’ jkun hemm xejn iktar.
 
Sfortunatament, domna wisq niddependu minn ħaddieħor biex nipproteġu lilna nfusna. Imma l-era tad-“dividendi tal-paċi” spiċċat. Il-gwerra brutali tar-Russja kontra l-Ukrajna fakkritna f’dan bl-agħar mod. Issa l-Istati Membri kollha jifhmu li l-Ewropa ma tistax tibqa’ tiddependi minn ħaddieħor għad-difiża tagħha. Il-Parlament Ewropew dan jafu wkoll: biex tkun sigura, l-Ewropa trid tikber.
U Ewropa sigura hija Ewropa li taf x’inhu strateġiku. Il-paċi ma sseħħx waħedha: trid tinbena, tiġi protetta u difiża. Niftakar meta ltqajt mal-mibki Papa Franġisku: raġel ta’ prinċipju, ta’ umiltà u ta’ konvinzjoni. Erġajt rajt dik l-istess ċarezza fil-Papa Ljun XIV, meta ltqajna għall-quddiesa ta’ inawgurazzjoni tiegħu ġimgħa ilu, meta talab għal dinja aktar magħquda u ta’ paċi.
 
L-Ewropa trid titkellem – u taġixxi – b’kuraġġ. Għalhekk huwa fundamentali li nsaħħu l-appoġġ tagħna lill-Ukrajna. Għal paċi ġusta u dejjiema, u dan għandu jkun ukoll l-objettiv meta nħarsu lejn il-kriżi fil-Lvant Nofsani u lejn is-sitwazzjoni traġika f’Gaża.
 
Ewropa sigura ma tittollerax l-inġustizzja. Iżżarma x-xbieki kriminali. Tipproteġi l-fruntieri. Tieħu ħsieb il-flussi migratorji billi tkun ġusta ma’ min tassew għandu bżonn, soda ma’ min ma għandux dritt u iebsa ma’ min jisfrutta dawk l-aktar batuti. Qatt u qatt ma għandna ninsew, f’dan ir-rigward, li m’aħniex qed nitkellmu dwar numri, iżda dwar ħajjet il-bnedmin, ta’ nisa, irġiel u tfal li joħolmu b’ħajja aħjar.
 
Nikkonkludi billi ngħid li, biex tkun aktar konxja, aktar b’saħħitha u aktar sigura, l-Ewropa trid taġixxi aktar malajr ukoll.
Meta lqajna lill-President Mattarella fil-Parlament Ewropew, il-ġimgħa li għaddiet, huwa qal dan il-kliem: “Il-Parlament Ewropew huwa l-punt fokali li jgħaqqad l-istituzzjonijiet maċ-ċittadini”. Ejjew nieħdu din ir-responsabbiltà bl-akbar serjetà.
 
F’dawn l-aħħar tliet snin il-Parlament għamel riformi kbar biex iwieġeb aħjar għall-bżonnijiet taċ-ċittadini. Ma kinitx faċli, imma dan nafuh sew: l-Ewropa mhi xejn mingħajr niesha.
 
Issa jeħtieġ inkunu saħansitra aktar effiċjenti. Għalhekk, jekk irridu Unjoni Ewropea tassew demokratika u reattiva, wasal il-mument li nsaħħu d-dritt ta’ inizjattiva leġiżlattiva tal-Parlament.
 
B’hekk biss nibnu Ewropa aktar konxja, aktar sigura u aktar b’saħħitha. B’hekk biss nerġgħu nqiegħdu l-Ewropa f’idejn ċ-ċittadini Ewropej.
 
“Non est ad astra mollis e terris via” – it-triq mid-dinja sal-kwiekeb mhijiex faċli.
 
Wara kollox, is-sempliċità qatt ma kienet il-kejl ta’ azzjonijietna. U żgur li l-Ewropa ma nbnietx b’perkors mingħajr ostakli.
 
Huwa tabilħaqq meta tħabbat wiċċek mal-aktar sfidi ibsin li d-dinja tinbidel. Ejjew inkomplu nbiddluha flimkien.
 
Viva l-Italja u viva l-Ewropa.
 
Grazzi.