Il-President tal-Parlament Ewropew Roberta Metsola indirizzat id-diskors tal-ftuħ waqt l-Istat tal-Unjoni 2022 fl-Istitut Universitarju Ewropew f'Firenze. Fid-diskors tagħha 'L-Ewropa lesta għall-ġenerazzjoni li jmiss?",hi wasslet messaġġ ta' kuraġġ liċ-ċittadini u mexxejja Ewropej biex jemmnu, jkunu kunfidenti u jużaw dan il-mument diffiċli fl-istorja bħala opportunità għall-bidla.
Għeżież mistednin distinti, Għażiż Professur Dehousse, Għażiż Sindku, Għeżież Ewropej,
Grazzi lill-EUI talli laqagħni hawnhekk illum, f'dan il-post sabiħ. L-EUI jirrappreżenta ġid pubbliku reali billi jikkontribwixxi għall-wirt u l-valuri Ewropej tagħna u jaqsamhom mal-akkademiċi u billi huwa r-rabta bejn l-akkademja u dawk li jfasslu l-politika.
L-ewwel ħaġa li xtaqt nagħmel hija li nfakkar il-memorja ta' David Sassoli. Huwa kien iħobbha lil Firenze.
David kien ġellied għall-Parlament Ewropew, għalina, għall-Ewropa.
Huwa jemmen fis-saħħa tal-Ewropa biex issawwar triq ġdida f'din id-dinja.
Din hija l-essenza tal-kwistjoni li għandna quddiemna llum.
Iżda qabel ma neżaminaw x'għandha tkun l-"Ewropa", nemmen li jeħtieġ li nifhmu aħjar x'inhi l-"Ewropa" u, b'mod aktar importanti, x'iridu n-nies li tkun l-Ewropa.
Fl-ewwel diskors tiegħi bħala President tal-Parlament Ewropew iddeskrivejt lili nnifsi bħala parti mill-ġenerazzjoni li ma tarax l-Ewropa f'termini ta' Ewropa qadima u dik ġdida. Aħna l-ewwel ġenerazzjoni tal-Erasmus, u l-aħħar waħda mill-ġenerazzjoni Wałęsa, Kohl u Havel.
Dak li ridt ngħid huwa li jien parti mill-ġenerazzjoni tal-Ewropa. 18-il sena ilu, fl-1 ta' Mejju, kont bil-wieqfa fil-Belt Valletta flimkien ma' dak li ħassejt kien qisu l-pajjiż kollu, fejn f'nofsillejl kont qed inħares lejn il-baħar fil-Port il-Kbir tagħna hekk kif għoddejna l-minuti u s-sekondi sakemm Malta, flimkien ma' disa' pajjiżi oħra, issieħbet fl-Unjoni Ewropea bħala Stat Membru.
Għadni niftakar is-sentiment ta' possibbiltà, tama u twemmin bla rażan fil-futur. Tip ta' sens ta' ritorn lejn id-dar, ta' rebħa fil-potenzjal tal-poplu tagħna, ta' serħan, ta' ferħ – sentimenti kondiviżi minn miljuni ta' nies madwar l-Ewropa.
Bil-gwerra fl-Ewropa, illum, huwa dak l-ispirtu, dak is-sens ta' raġuni, ta' entużjażmu, ta' direzzjoni ċara, li rrid li l-proġett Ewropew tagħna jerġa' jaqbad.
In-nies fl-Ukrajna, fil-Moldova u l-Georgia, u fil-pajjiżi tal-Balkani tal-Punent li għadhom ma daħlux, issa qed iħarsu lejn l-Ewropa, bl-istess sens ta' appartenenza u tama.
U rrid li n-nies jemmnu kif għamilna aħna. U biex nagħmlu dan jeħtieġ li nifhmu li m'aħniex biss blokk ekonomiku, m'aħniex biss dwar il-moviment liberu, jew dwar it-tneħħija tat-tariffi tar-roaming. Għall-ġenerazzjoni tiegħi, l-Ewropa hija – għalkemm taf tinstema' bħala cliché – dwar ħolma komuni. Dwar valuri komuni. Dwar futur komuni, dwar li ningħaqdu flimkien.
Għalina, l-Ewropa hija l-futur. Dejjem kienet il-futur.
Madankollu, ma nistgħux niċħdu li matul l-aħħar snin, il-polarizzazzjoni fis-soċjetajiet tagħna żdiedet. Għad hemm wisq nies li jħossuhom mitlufa, abbandunati u esklużi. Fl-istess ħin, ħafna issa se jħarsu lejn l-Ewropa u lejn l-istituzzjonijiet tagħna għal tmexxija. U jeħtieġ li nkunu kapaċi nirreaġixxu, li nkunu kapaċi mmexxu. Hemm bżonn li nikkumbattu n-narrattiva kontra l-UE li tinfirex tant faċilment u daqshekk malajr: miżinformazzjoni u diżinformazzjoni, imsaħħa mill-bots u ffabbrikati fil-fabbriki tat-trolls Russi.
L-Ewropa hija dwar id-difiża tal-multilateraliżmu. L-idea li l-futur nistgħu niffaċċjawh biss flimkien.
Sinjuri,
It-tmexxija teħtieġ kapaċità li tkun ukoll awtokritiku. U rridu nirrikonoxxu li jeżisti distakk bejn dak li aħna emminna, dak li n-nies jistennew, u dak li l-Ewropa hija kapaċi twettaq bħalissa.
L-avvenimenti ta' dawn l-aħħar xhur, bl-invażjoni brutali, illegali u medjevali tal-Ukrajna min-naħa tar-Russja, aċċelleraw il-ħtieġa li l-Ewropa toħloq l-għodod u l-proċessi li teħtieġ biex tmexxi f'din id-dinja ġdida u inċerta.
Hemm realtà ta' qabel l-24 ta' Frar u realtà ta' wara l-24 ta' Frar. Id-dinja nbidlet. Irridu nifhmu li l-piż tal-ordni demokratiku globali issa waqa' aktar minn qatt qabel fuq spallejn l-Ewropa. U rridu nkunu kapaċi nġorruh.
Huwa l-mument tagħna li fih irridu nuru determinazzjoni assoluta, akkost ta' kollox. Mument li jiġi darba f'ġenerazzjoni.
Mument fejn irridu nifhmu li l-Ewropa tinsab ukoll fit-toroq ta' Bucha, fil-mini ta' Mariupol, fil-kantini ta' Irpin, fuq ix-xtut ta' Snake Island.
In-nies li qed jiġu brutalizzati qed ifittxu l-appoġġ tagħna, għat-tama – anke għas-sopravivenza. Huma jifhmu li ma hemm l-ebda alternattiva għall-Ewropa.
Kull min għex taħt l-awtokrazija li kkaratterizzat tant nazzjonijiet fl-Ewropa fl-aħħar seklu jifhem wisq li m'hemm l-ebda mod ieħor.
L-Ewropa tista' ma tkunx perfetta – m'aħniex perfetti – iżda aħna nirrappreżentaw bastjun ta' demokrazija liberali, ta' libertajiet personali, ta' libertà tal-ħsieb, ta' sikurezza u sigurtà. Fejn tista' tkun kulmin tixtieq tkun. Mod ta' ħajja u għajxien li forsi ħadna, għal żmien twil wisq, bħala fatt aċċettat.
Fl-Ewropa, niċċelebraw id-differenzi. Huwa dak li jippermettilna niżviluppaw u dak li se jippermettilna nsiru aktar b'saħħitna. Dak li jagħmilna uniċi. Dak li jagħmilna Ewropej.
L-iżball gravi ta' Putin kien li assuma li d-differenzi tagħna kienu dgħufija; id-difiża tagħna tad-drittijiet fundamentali, sinjal ta' dgħufija. Kien żbaljat. F'demokraziji bħal tagħna, dawn huma l-punti b'saħħithom tagħna. Dawn huma l-pedamenti tal-passi li jmiss. Huma l-leġittimità tagħna u huma l-boxxla tagħna.
Huwa għalhekk li aċċellerajna l-isforzi tagħna lejn il-bini ta' Unjoni ta' Sigurtà u ta' Difiża ġdida.
Għaliex irridu nħollu u se neliminaw id-dipendenzi tagħna mill-Kremlin.
Għaliex se ntemmu l-importazzjonijiet taż-żejt u għaliex irridu mmexxu l-politika tagħna ta' gass żero mir-Russja.
Għaliex se nkomplu bis-sanzjonijiet u se ngħinu lill-Ukrajna.
Għaliex se nerġgħu nibnu l-Ukrajna u jeħtiġilna nagħmlu dan.
Għaliex se nieħdu ħsieb u se nilqgħu lil dawk kollha li jaħarbu l-bombi, il-missili u l-atroċitajiet ta' Putin.
U din hija r-raġuni għaliex l-Ukrajna se tirbaħ. Huwa għalhekk li l-Ewropa se tkun lesta għall-ġenerazzjoni li jmiss.
Fir-rigward tal-popolazzjonijiet tagħna, qed isir dejjem aktar ċar li l-mexxejja Ewropej ma jistgħux jonqsu milli jindirizzaw iż-żieda fil-prezzijiet u ż-żieda fl-għoli tal-ħajja li qed jolqtuhom ħażin ħafna. U għan-negozji Ewropej f'ekonomija globalizzata mqallba bil-konsegwenza tal-gwerra, l-Unjoni Ewropea trid tkompli tinkoraġġihom u tappoġġjahom hekk kif jiddiversifikaw billi jitbiegħdu mir-Russja.
Iżda għal darb'oħra rridu nkunu onesti – nistgħu ntaffu l-konsegwenzi safejn hu possibbli – iżda l-mod tagħna, il-mod Ewropew tagħna, għandu prezz. Ta' min niddefenduh u dak il-prezz ikun jaqblilna nħallsuh.
L-Ewropa wriet lid-dinja d-determinazzjoni, is-solidarjetà u l-għaqda mingħajr preċedent kontra l-gwerra. Ta' dan, ninsab kburija. Irid jibqa' l-mudell li abbażi tiegħu nimxu 'l quddiem. Se nkomplu niġġieldu bil-qawwa kontra l-awtokrazija u se nkomplu nappoġġjaw bil-qawwa lill-Ukrajna u l-valuri komuni tagħna tad-demokrazija, id-dinjità, il-ġustizzja, l-ugwaljanza u l-istat tad-dritt. Irridu nsiru eqreb, iżda fl-istess ħin inkunu aktar miftuħa.
Wara t-Tieni Gwerra Dinjija, il-persuni ċiniċi żżebilħu bid-dikjarazzjoni ta' Jum l-Ewropa ta' Robert Schuman fl-1950 u qisuha bħala aspirazzjoni utopika għall-paċi u l-prosperità. Madankollu, it-twemmin, f'dak li deher impossibbli għall-Ewropa, huwa għalhekk ir-raġuni għaliex ninsabu hawnhekk flimkien, illum, f'dan il-Palazzo Vecchio – emblema taċ-ċivilizzazzjoni Ewropea – fejn qed niddiskutu l-kisbiet tagħna u l-passi li jmiss għall-futur Ewropew komuni tagħna.
Il-wirt tagħna – dak li nħallu għal dawk li jiġu warajna – mhux se jkun biss palazzi mżejna iżda sisien sodi għal mod Ewropew ġdid.
Għandi fiduċja fil-ġenerazzjoni li jmiss. Ninsab ċerta li se jagħtu sehemhom għall-azzjoni klimatika, se jgawdu mill-benefiċċji ta' ekonomija diġitali, se jikkunsmaw b'mod differenti mil-lum. Madankollu, ma nistgħux nippretenduhom isolvu kriżijiet mhux riżolti, li għandhom jiġu indirizzati minna.
Huma jeħtieġu li nieħdu r-responsabbiltajiet tagħna b'mod serju, illum. L-Ewropa għandha bżonn it-tmexxija, illum. Mhux għada.
Tmexxija li ratna nilqgħu aktar minn 5 miljun persuna li qed jaħarbu mill-Ukrajna. Tmexxija li tinsab ukoll hawnhekk fl-EUI ma' persuni li ħadmu ħafna biex jintegraw u jiffaċilitaw professuri, akkademiċi u studenti Ukreni f'din l-istituzzjoni.
Nhar it-Tnejn li ġej, f'Jum l-Ewropa, se nirċievu l-konklużjonijiet tal-Konferenza dwar il-Futur tal-Ewropa: ir-riżultati ta' konsultazzjoni pan-Ewropea taċ-ċittadini. Ir-responsabbiltà se tkun fuqna, il-mexxejja Ewropej, li nisimgħu, u nadottaw ir-rakkomandazzjonijiet: f'dik li hija azzjoni fuq it-talbiet tan-nies għall-bidliet fil-politika, għad-difiża, is-saħħa, il-klima, is-sigurtà u aktar. Din hija opportunità reali għall-Ewropa – għaliex jekk mhux issa, allura meta?
Bil-ħruġ minn pandemija devastanti u minn mindu sar l-attakk illegali u brutali tar-Russja fuq l-Ukrajna, issa ninsabu f'salib it-toroq storiku.
Il-mexxejja Ewropej flimkien iridu jiddefendu l-politiki tat-tama. Irridu nikkonfrontaw iċ-ċiniżmu faċli u nibqgħu sodi kontra l-aggressjoni. U sakemm inżommu l-prijoritajiet tagħna tajbin, ninsab konvint li aħna adatti għall-ġenerazzjoni li jmiss.
Ippermettuli ntemm b'din in-nota ta' ottimiżmu: Il-verità hija li l-Unjoni Ewropea qatt ma kienet aktar b'saħħitha. L-Unjoni Ewropea qatt ma kellha sens daqshekk determinat ta' direzzjoni bħalma għandha llum. Qatt ma kellna tali sens ta' skop biex nindirizzaw b'mod kollettiv il-gwerra fil-kontinent tagħna, l-emerġenza klimatika, it-tranżizzjoni diġitali tagħna u t-tħassib dwar l-enerġija.
Qatt ma ħassejna tali xewqa biex ningħaqdu flimkien kontra t-theddid għall-paċi u l-prosperità. Qatt ma konna aktar determinati li niddefendu d-drittijiet fundamentali Ewropej tad-demokrazija, il-libertà, is-solidarjetà u l-ugwaljanza.
Nagħrfu t-theddid li qed niffaċċjaw u nafu li rridu nikkonfrontawh.
Ejjew ikollna fiduċja fina nfusna. Ejjew nemmnu.
Grazzi.