Matul iż-żjara tagħha fi Kiev, il-President tal-Parlament Ewropew Roberta Metsola rċeviet id-Dottorat Onorarju mill-Università Nazzjonali Taras Shevchenko ta’ Kiev. Waqt li kienet qed tindirizzata lill-istudenti, il-President Metsola tat ġieħ lill-ħidma tal-Università fit-trawwim tal-ġenerazzjoni li jmiss ta’ mexxejja.
Rettur Volodymyr Buhrov, L-Ewwel Viċi Rettur Ksenia Smyrnova, President Ruslan Stefanchuk, Għeżież professuri, Għeżież studenti, Għeżież Ewropej,
Huwa unur li ninsab quddiemkom illum, fl-Università Nazzjonali Taras Shevchenko ta’ Kiev, biex nirċievi dan id-dottorat onorarju u nagħti ġieħ lill-ħidma eċċezzjonali li qed twettaq din l-istituzzjoni fit-trawwim tal-ġenerazzjoni li jmiss ta’ mexxejja. Ta’ mexxejja Ukreni. Ta’ mexxejja Ewropej.
Mill-bidu tal-invażjoni Russa, kelli l-privileġġ li nżur l-Ukrajna diversi drabi. U ppermettuli ngħid, li xorta tibqa’ esperjenza diffiċli nara l-qerda, il-mewt, it-tbatija, id-djar abbandunati kollha li sa ftit żmien ilu miljuni ta’ nies kienu jsejħulhom djarhom. Qatt m’jien se ninsa l-ewwel darba li ġejt Kiev fl-1 ta’ April 2022, dakinhar is-suldati Ukreni lliberaw il-belt ta’ Bucha, biex jiskopru l-barbariżmu kbir tar-reġim Russu.
Iżda, f’din il-qerda, l-Ukrajna wrietni wkoll l-aktar forma b’saħħitha u qawwija ta’ kuraġġ, ta’ reżistenza, ta’ tama li fiha jista’ jemmen kwalunkwe nazzjon u kwalunkwe poplu. Meta wasalt Kiev, ftit ġimgħat wara li faqqgħet il-gwerra illegali tar-Russja, il-belt kienet tbattlet għalkollox. Kien hemm punti ta’ kontroll kullimkien, u meta wasalna fil-Parlament Ukren, f’daqqa waħda rajt mijiet ta’ membri parlamentari f’emiċiklu li qed jiffunzjona b’mod kważi normali, jaħdmu u organizzaw laqgħat. F’dak il-mument, fhimt li d-dawl dejjem se joħroġ rebbieħ fuq id-dlam.
F’dik iż-żjara, kelli l-unur u r-responsabbiltà li nwassal – personalment – il-messaġġ ta’ appoġġ tal-Parlament Ewropew lill-plenarja tal-Verkhovna Rada. Sentejn wara l-invażjoni illegali tar-Russja f’pajjiżkom, fid-9 ta’ Mejju, Jum l-Ewropa, nixtieq nassigurakom li l-messaġġ tagħna għadu validu. Illum u sakemm ikun hemm bżonn.
L-Unjoni Ewropea u d-dinja ratkom tiddefendu lil pajjiżkom b’kuraġġ. Iżda nifhmu li qed tiġġieldu mhux biss biex tipproteġju lil djarkom u lit-territorju tagħkom – qed tiġġieldu għal dak kollu li nemmnu fih. Il-libertà. Id-demokrazija. L-istat tad-dritt. Għal dawk l-ideali li jorbtuna bħala aħwa. Li jagħmluna lkoll kemm aħna Ewropej.
Huwa għalhekk li l-istituzzjonijiet tal-UE u l-Istati Membri ngħaqdu flimkien b’għaqda bla preċedent biex jipprovdu għajnuna politika, diplomatika, finanzjarja, militari u umanitarja lill-Ukrajna u lill-poplu tagħha. U għalhekk se nkomplu nagħmlu dan. Għalhekk inqtajna mill-enerġija Russa, għalhekk adottajna 13-il pakkett ta’ sanzjonijiet biex inxekklu l-finanzjament tal-magna tal-gwerra tar-Russja u għalhekk qatt mhu se nistrieħu sakemm kull awtur ta’ dawn id-delitti tal-gwerra faħxija jagħti rendikont ta’ għemilu. Lil hinn minn rikonoxximent tal-ħidma tal-Parlament Ewropew, inqis dan id-dottorat onorarju bħala responsabbiltà biex inkomplu nippromwovu l-valuri komuni tagħna u nkomplu nieqfu mal-Ukrajna.
Nafu bis-sagrifiċċju li qed jagħmlu l-Ukreni għall-Ewropa. Anke u speċjalment f’dawn iż-żminijiet diffiċli, pajjiżkom għamel sforzi kbar biex jallinja ruħu mal-acquis tal-UE – u hawnhekk ippermettuli nsemmi s-sodisfazzjon li taħdem daqshekk mill-qrib mal-President Stefanchuk, li l-Parlament Ewropew u l-Verkhovna Rada jkollhom relazzjonijiet daqshekk b’saħħithom, fil-proċess ta’ implimentazzjoni tar-riformi meħtieġa min-naħa tal-Ukrajna.
Il-Parlament Ewropew kien l-ewwel istituzzjoni tal-UE li talab li lill-Ukrajna jingħata l-istatus ta’ pajjiż kandidat tal-UE u konna l-aktar sostenitur konvint biex in-negozjati għall-adeżjoni mal-UE jibdew is-sena li għaddiet. U se nkomplu nagħmlu pressjoni biex l-Ukrajna tiġi inkluża gradwalment fis-suq uniku tal-UE u fil-programmi settorjali, inkluża l-inizjattiva ewlenija tagħna Erasmus+. Għax nifhmu u nemmnu fil-poter trasformattiv li jġib miegħu t-tkabbir tal-UE. U li dan se jagħmel lill-Ukrajna aħjar, aktar sikura u aktar prospera f’Unjoni Ewropea aktar b’saħħitha u reżiljenti.
Meta nħares ’il quddiem, għandi nistqarr magħkom li l-proċess ta’ tkabbir mhux se jkun faċli. Għaddejt minnu jiena stess meta pajjiżi għamel id-deċiżjoni storika li jingħaqad mal-Unjoni Ewropea. U filwaqt li huwa minnu li s-sħubija fl-UE se taffettwa lil kull Ukren u Ukrena, huwa minnu wkoll li dan se jirrikjedi l-impenn ta’ kull wieħed u waħda minnkom.
Bħala studenta, bejn wieħed u ieħor tamparkom, il-kawża tiegħi kienet li nappoġġja lil pajjiżi fi triqtu biex jissieħeb fl-Unjoni Ewropea. Kont inkun hemm kuljum, fil-kampus tal-Università ta’ Malta, mhux wisq differenti minn dan li qegħdin fih, nikkonvinċi lil studenti u ħbieb oħrajn bil-potenzjal trasformattiv li s-sħubija fl-UE kellha għal pajjiżna. Forsi qattajt wisq ħin nagħmel dan, u ma ddedikajtx biżżejjed ħin għall-istudji biex nikseb il-lawrja attwali tiegħi. Tal-inqas hekk jgħidulek il-ġenituri tiegħi kieku kellek issaqsihom.
Iżda l-punt tiegħi huwa li jista’ jkun hemm l-oqfsa kollha meħtieġa fis-seħħ, il-ftehimiet kollha bl-iswed fuq l-abjad u l-kalendarji kollha stabbiliti, iżda r-rwol li Generation Europe għandu jkollha huwa essenzjali f’kull pajjiż prospettiv tal-UE. Kburija li kont parti minn Generation Europe f’pajjiżi. Issa, Generation Europe fl-Ukrajna hija intom ilkoll.
Ir-responsabbiltà li ssawru t-trajettorja storika ta’ pajjiżkom hija f’idejkom. Ir-responsabbiltà li ssawru d-destin tal-proġett Ewropew tagħna hija wkoll f’idejkom. Ma hemm l-ebda raġuni biex niddubita li xi ħadd minnkom, xi darba, ikun qiegħed hawn floki.
Għeżież ħbieb,
Ir-reżiljenza u d-determinazzjoni tagħkom li tiġu l-Università u tkomplu l-edukazzjoni tagħkom, anke jekk hemm għaddejja gwerra mhux provokata u illegali kontra pajjiżkom, huma ammirevoli. Forsi ssibu ispirazzjoni fit-tmexxija ta’ pajjiżkom. Forsi tagħmlu dan f’ġieħ l-għeżież tagħkom li qed jiġġieldu fuq il-front. Forsi jagħtikom kuraġġ l-ispirtu kombattiv ta’ isem l-Università tagħkom, Taras Shevchenko. Irrispettivament minn fejn tisiltu l-forza tagħkom, nixtieq infaħħarkom li ħadtu din it-triq.
F’dawn iż-żminijiet diffiċli, pajjiżkom jeħtieġ viżjonarji, jeħtieġ strategi, jeħtieġ ġellieda, jeħtieġ ħaddiema umanitarji, iżda jeħtieġ ukoll studenti – tobba, inġiniera, avukati, xjenzjati, politiċi, mexxejja futuri bħalkom. Għax meta tintemm din il-gwerra brutali u l-Ukrajna toħroġ rebbieħa, l-Ukrajna u l-Ewropa se jkunu qed iduru fuqkom.
U huwa għalhekk li ninsabu grati lejn din l-Università talli żammet il-bibien istituzzjonali tagħha miftuħa u l-programmi tagħha għaddejjin fl-aktar ċirkostanzi diffiċli. Grazzi lir-Rettur Volodymyr Buhrov, grazzi lill-Ewwel Viċi Rettur Ksenia Smyrnova, grazzi lill-persunal u lill-professuri kollha.
Skont kliem l-innu tal-Università Nazzjonali Taras Schevchenko ta’ Kiev:
“L-istorja glorjuża tgħallimna Biex bejn dawn il-ħitan inwettqu s-sewwa, L-aqwa studenti huma t-tama tal-Istat. Dan huwa fejn jitkattar il-futur tagħna!”
U ħalluh ikompli jitkattar. Għall-Ukrajna u għall-Ewropa.
Slava Ukraini!
Id-diskors proprju jitqies bħala awtentiku.